by సూర్య | Sat, Jan 15, 2022, 08:23 PM

ఎక్కడ చూసినా పుష్ప సినిమా గురించి చర్చ సాగుతోంది. అల్లు అర్జున్ నట విశ్వరూపం ప్రదర్శించిన చిత్రం పుష్ప. సుకుమార్ దర్శకత్వం వహించిన ఈ చిత్రం డిసెంబరులో ప్రేక్షకుల ముందుకి వచ్చి, బాక్సాఫీసు వద్ద కాసుల వర్షం కురిపిస్తోంది. కాగా, ఈ చిత్రంలో అల్లు అర్జున్ పలికే తగ్గేదే లే డైలాగ్ అన్ని వర్గాల వారిని ఆకట్టుకుంటోంది. టీమిండియా క్రికెటర్ రవీంద్ర జడేజా, ఆసీస్ క్రికెటర్ డేవిడ్ వార్నర్ కూడా ఈ డైలాగ్ ను బన్నీ శైలిలో పలికి రక్తికట్టించారు. ఇదిలా ఉంటే ఈ సినిమాలో పాటలన్నీ సూపర్ హిట్టే. ముఖ్యంగా శ్రీవల్లి పాటకు విశేష ప్రజాదరణ లభిస్తోంది. తాజాగా టీమిండియా క్రికెటర్లు శ్రీవల్లి పాటకు డ్యాన్స్ చేశారు. ఈ పాటలో అల్లు అర్జున్ ఓ స్టెప్పు వేస్తూ చెప్పు జారవిడుచుకుంటాడు. ఇప్పుడదే స్టెప్పును టీమిండియా ఆటగాళ్లు సూర్యకుమార్ యాదవ్, ఇషాన్ కిషన్ ప్రదర్శించారు. దీనికి సంబంధించిన వీడియోను పుష్ప చిత్రబృందం సోషల్ మీడియాలో పంచుకుంది.