హైకోర్టు నిర్ణయం కోసం పేట వాసుల నిరీక్షణ

చిలకలూరిపేట పురపాలక సంఘ ఎన్నికలు ముగియడం, అభ్యర్థుల ప్రమాణ స్వీకారం, చైర్మన్ వైస్ చైర్మన్ ఎన్నిక అన్ని సజావుగా పూర్తయ్యాయి. అయితే గణపవరం, పసుమర్రు గ్రామాల విలీనానికి సంబంధించిన పిటిషన్ పై హైకోర్టులో విచారణ జరుగుతోంది. దీనిపై మంగళ, బుధవారాలలో హైకోర్టు ఓ నిర్ణయం తీసుకునే అవకాశం ఉందని న్యాయవాదులు పేర్కొంటున్నారు. ఈ నేపథ్యంలో కోర్టు నిర్ణయం ఎలా ఉంటుందోనని అందరిలో ఆసక్తి నెల కొంది. కోర్టు విలీనం చట్టబద్ధమే అని సమర్థిస్తుందా... లేక విలీనం సరికాదని చెబుతుందా... అనేది ప్రశ్నార్థకంగా మారింది.

విలీనం చట్టబద్ధమే అని న్యాయవాదులు వేసిన పిటిషన్ను కొట్టి వేస్తే అసలు ఏ ఇబ్బంది ఉండదు. కానీ విలీనం సరికాదంటూ కోర్టు చెబితే మాత్రం గణపవరం లోని ఐదు వార్డులలో, పసుమర్రులోని రెండు వార్డుల నుంచి గెలిచి ప్రమాణ స్వీకారం చేసిన కౌన్సిలర్ అభ్యర్థుల భవితవ్యం ఏమిటి? ఆ రెండు గ్రామాల మినహాయించి చిలకలూరిపేట పట్టణంలో లో కౌన్సిల్ యధావిధిగా కొనసాగుతుందా..? రిజర్వేషన్ల ప్రకారం అసలు ఎన్నిక చెల్లుబాటు అవుతుందా..? ఇలాంటి ఎన్నో ప్రశ్నలు పట్టణ ప్రజల మెదళ్లలో మెదులుతున్నాయి. ఈ నేపథ్యంలో కోర్టు తీర్పు కోసం ఎదురుచూడవలసిన పరిస్థితి నెలకొంది.