by సూర్య | Fri, Oct 11, 2019, 04:45 PM

స్మార్ట్ ఫోన్ విభాగంలో జెండా పాతిన అనంతరం షావోమి, వన్ ప్లస్ కంపెనీలు టీవీల రంగంలో కూడా కాలు పెట్టిన సంగతి అందిరికీ తెలిసిందే. ఇప్పుడు అదే బాటలో మరో ప్రముఖ స్మార్ట్ ఫోన్ సంస్థ రియల్ మీ కూడా వెళుతుందా అంటే అవుననే సమాధానమే వినిపిస్తోంది. ఈ సంవత్సరం ఆఖరిలోపే మన దేశంలో తొలి టీవీని అందుబాటులోకి తీసుకురావాలనేది రియల్ మీ ప్రణాళికగా ఉన్నట్లు తెలుస్తోంది. రియల్ మీ ఎక్స్ టీ 730జీని డిసెంబర్ లో మార్కెట్లో లాంచ్ చేస్తున్నట్లు రియల్ మీ ప్రకటించిన విషయం తెలిసిందే. అదే ఈవెంట్లో టీవీని కూడా లాంచ్ చేస్తుందా లేక టీవీ లాంచ్ కు మరో ఈవెంట్ నిర్వహిస్తుందా అనే విషయాలు భవిష్యత్తులో తెలియనున్నాయి.

91 మొబైల్స్ అనే సంస్థ అందించిన నివేదికలో ఈ విషయం మొదటగా వెలుగులోకి చూసింది. ఆ నివేదిక ప్రకారం డిసెంబర్ లో జరిగే రియల్ మీ ఈవెంట్లో రియల్ మీ ఎక్స్ టీ 730జీ, రియల్ మీ ఎక్స్2 ప్రోతో పాటు టీవీని కూడా లాంచ్ చేస్తారని తెలిపారు.

ఈ టీవీకి సంబంధించిన స్పెసిఫికేషన్లు కానీ, ధర కానీ, ప్రత్యేక ఫీచర్ల వివరాలు కానీ ఏవీ ఇంతవరకు తెలియరాలేదు. అయితే మార్కెట్లో లాంచ్ అవ్వగానే, రియల్ మీకి రెడ్ మీ రూపంలో గట్టి పోటీ మాత్రం తయారుగానే ఉంటుంది. ఎందుకంటే బడ్జెట్ స్మార్ట్ ఫోన్లే కాకుండా బడ్జెట్ స్మార్ట్ టీవీల విభాగంలో కూడా షావోమి మార్కెట్లో ముందంజలో ఉంది. 32 అంగుళాల నుంచి 65 అంగుళాల వరకు ప్రతీ సైజులో ఎంఐ టీవీలు మార్కెట్లో దూసుకుపోతున్నాయి. కాబట్టి షావోమికి పోటీ ఇవ్వాలంటే రియల్ మీ కూడా వీలైనన్ని ఎక్కువ సైజుల్లో టీవీలను లాంచ్ చేయక తప్పదు.