సుప్రీంకోర్టు కొలీజియంపై న్యాయ మంత్రి విమర్శలు

శాసన, కార్యనిర్వాహక, న్యాయవ్యవస్థలకు దిశానిర్దేశం చేసేది రాజ్యాంగమేనని, ఆ మూడింటి బాధ్యతలకు సంబంధించి ‘లక్ష్మణ రేఖ’ స్పష్టంగా ఉందని కేంద్ర న్యాయశాఖ మంత్రి కిరణ్‌ రిజిజు వ్యాఖ్యానించారు. శనివారం జరిగిన ఇండియా టుడే కాంక్లేవ్‌లో ఆయన మాట్లాడుతూ.. పాలనాపరమైన నియామకాల్లో జడ్జీలు జోక్యం చేసుకుంటే న్యాయ విధులు ఎవరు నిర్వర్తిస్తారని ఆయన ప్రశ్నించారు. ప్రధాన ఎన్నికల కమిషనర్‌, ఇతర ఎన్నికల కమిషనర్ల నియామకానికి సంబంధించి ప్రత్యేక కమిటీని ఏర్పాటు చేయాలంటూ ఇటీవల సుప్రీంకోర్టు ధర్మాసనం ఇచ్చిన తీర్పుపై అడిగిన ప్రశ్నకు ఆయనపై విధంగా స్పందించారు.

దేశ వ్యతిరేక ముఠాలో భాగస్వాములైన కొందరు సామాజికవేత్తలు, కొద్ది మంది మాజీ జడ్జిలు కోర్టులు విపక్ష పాత్ర పోషించాలని కోరుకుంటున్నారని కిరణ్‌ రిజిజు విమర్శించారు. ఇదే కార్యక్రమంలో పాల్గొన్న సుప్రీంకోర్టు ప్రధాన న్యాయమూర్తి జస్టిస్ డీవై చంద్రచూడ్ ఈ వ్యాఖ్యలపై ఘాటుగా స్పందించారు. న్యాయమూర్తుల నియామకం కోసం ఏర్పాటు చేసుకున్న కొలీజియం ఉత్తమమైనదని ఆయన సమర్థించారు. ‘ఆ విషయంలో న్యాయశాఖ మంత్రితో వాదనలు చేయాలనుకోవడం లేదు.. ఆయనకో అభిప్రాయం ఉంది, నాకో అభిప్రాయం ఉంది. భిన్నాభిప్రాయాలుంటే తప్పేంటి? న్యాయ వ్యవస్థలోనే కాదు ప్రభుత్వంలోనూ అభిప్రాయ భేదాలు ఎదురవుతుంటాయి’ అని వ్యాఖ్యానించారు.

‘కొలీజియం ప్రధాన లక్ష్యం న్యాయ వ్యవస్థ స్వతంత్రతను కాపాడటం, బాహ్య ప్రభావాల నుంచి దానికి రక్షణ కవచం ఏర్పాటు చేసుకోవడమే’నని సీజేఐ పేర్కొన్నారు. వ్యవస్థను ఉన్నది ఉన్నట్లుగా ముందుకు తీసుకెళ్లడమే ప్రధాన న్యాయమూర్తిగా తన బాధ్యతని పేర్కొన్నారు. జడ్జీల నియామకాలకు సరైన నియమ నిబంధనలను పాటిస్తున్నట్లు స్పష్టం చేశారు. తీర్పుల్లో ఇతరుల జోక్యం గురించి మాట్లాడుతూ ‘‘కేసుల్లో ఎలాంటి నిర్ణయం తీసుకోవాలన్న దానిపై ప్రభుత్వం నుంచి ఎలాంటి ఒత్తిడి ఉండదు.. న్యాయమూర్తిగా నా 23 ఏళ్ల కెరీర్‌లో ఏ కేసు విషయంలోనూ ఇలాంటి తీర్పు ఇవ్వాలని ఎవరూ చెప్పలేదు’’ అని జస్టిస్‌ చంద్రచూడ్‌ వెల్లడించారు.

సోషల్ మీడియాలో న్యాయమూర్తులపై వస్తున్న ట్రోలింగ్స్‌‌పై సీజేఐ స్పందిస్తూ..‌ అలాంటి వ్యంగ్యాస్త్రాలు తమను ప్రభావితం చేయలేవన్నారు. మాజీ సీజేఐ జస్టిస్‌ యూయూ లలిత్‌ కొలీజియం వ్యవస్థ ఆదర్శప్రాయమైనదని పేర్కొనగా.. మరో మాజీ సీజేఐ జస్టిస్‌ ఎస్‌.ఎ.బోబ్డే దానిని సమర్థిస్తూనే ప్రభుత్వ అభిప్రాయం కూడా కీలకమేనన్నారు.